لو مخلفتش تطلق

سالب، مستحيل تيجي منهم، فضلت تدعي ان محدش ياخد باله، بس محمد اخو محمود اللي كان عارف السر شاف التحليل و سكت.
بالليل محمد كلمها و قالها لازم تقولي لمحمود الحقيقة يا مليكة، الكدب ملوش رجلين، و البنت لما تكبر من حقها تعرف، مليكة قعدت تعيط و قالت انا لو قلتله هيطلقني و هياخد مني همسه، انا مقدرش اعيش من غيرها، محمد قالها محمود بيحبك و بيحب البنت و عمره ما هيعمل كده، بس لو عرف من حد غيرك هي دي اللي هتوجعه.
مليكة قعدت تلت ايام مش عارفة تنام، همسه كل ما تضحكلها تحس ان قلبها هيتقطع، لحد ما في يوم بالليل محمود رجع من الشغل لقى مليكة قاعدة و همسه نايمة جنبها، قالها مالك، مليكة حضنت همسه و قالتله محمود انا لازم اقولك حاجة و لو بتحبني و بتحب همسه اسمعني للاخر و متقطعنيش.
و حكتله كل حاجة من اول كلمة حماتك قالتها لو مخلفناش هنطلق لحد ما راحت دار الايتام و شافت همسه و مقدرتش تسيبها، و انها كدبت عليه عشان كانت خايفة تخسره و خايفة يجيب واحدة تانية مكانها، محمود سكت سكتة طويلة اوي، طويلة لدرجة ان مليكة افتكرت انه مات، و بعدين قام و راح ناحية همسه و شالها و باسها و دموعه نزلت، و قال لمليكة انا كنت فاكر اني بحب همسه عشان هي حتة منك، دلوقتي عرفت اني بحبها عشان هي همسه، بنتي انا، اللي ربتني من اول و جديد و علمتني يعني ايه ابقى اب.
و قالها انا زعلان منك عشان خبيتي عليا و شيلتي الهم لوحدك، بس عمري ما هزعل من همسه، همسه دي هتفضل بنتي ليوم الدين، و اللي يقول غير كده هقطع لسانه، و حضن مليكة و همسه في حضنه و قالها احنا التلاتة عيلة، و ربنا هو اللي بعتها لينا.
تاني يوم محمود راح لامه و قالها يا ماما همسه مش من صلبي بس هي بنتي غصب عن اي حد، و انا راضي و مليكة ست الستات و كفاية انها ادتني بنت زي القمر دي، و لو انتي عايزة تقولي لو مخلفناش هنطلق تاني قوليها لنفسك، انا مش هطلق مراتي ولا هسيب بنتي.
الست فاطمة في الاول اتصدمت و قعدت تلطم، بس لما شافت همسه بتضحكلها و بتقولها يا تيتة قلبها رق، و قالت خلاص اللي ربنا كاتبه هو اللي هيكون، و البت دي دخلت قلبي من اول يوم، و بقت هي اكتر واحدة بتحب همسه.
و عاشو كلهم مع بعض، و مليكة بطلت تخاف، و فهمت ان الامومة مش بطن بتشيل، الامومة حضن بيشيل، و ان الكدب حتى لو بنية حلوة بيوجع، بس الحب الصادق بيصلح اي حاجة، و همسه كبرت و هي عارفة انها متبنية و فخورة ان عندها ام زي مليكة و اب زي محمود حبوها و اختاروها من وسط كل الدنيا، و كايلا صاحبتها بقت خالتها اللي مبتفارقهاش و احمد و محمد بقو اعمامها اللي شايلينها في عنيهم و كل ما حد يشوف همسه يقول البت دي متربية و مليانة حب و ده عشان مليكة ادتها كل الحب اللي كان متشال جواها بقاله سنين و محمود بقى اب حنين اوي و بقى يحكي لكل الناس ان بنته دي جت بدعوة حلوة في ليلة كان فاكر ان خلاص مفيش امل و ربنا بعتله همسه عشان تهمسله ان لسه فيه خير في الدنيا و ان العيلة مش بالدم بس العيلة بالقلب اللي بيختار يحب للاخر و يفضل جنب اللي بيحبه مهما حصل.