صدمة العمر 4
الفصل الرابع
بعد ما قابلت الراجل ده قدام مركز المتابعة فضلت أفكر فيه يومين كاملين
مش علشانه هو شخصيًا
لكن علشان الإحساس اللي حسيت بيه وقتها
إحساس إني إنسانة طبيعية
إني مش مجرد مريضة
مش مجرد ست خرجت من معركة سرطان
مش مجرد زوجة خانها جوزها
لأ
كنت ندى
بس ندى
ولأول مرة من سنين طويلة حد بصلي من غير شفقة
ومن غير أسئلة
ومن غير نظرات خوف
عدى أسبوع كامل قبل ما أشوفه تاني
كنت رايحة أعمل بعض التحاليل ولقيته واقف عند الكافيه الصغير اللي جنب المستشفى
أول ما شافني ابتسم
وقال
الحمد لله شكلك أحسن النهارده
ابتسمت غصب عني
وقلت
الحمد لله
سكت ثواني وبعدين قال
ينفع أعزمك على قهوة
في الظروف العادية كنت هرفض فورًا
لكن حاجة جوايا قالتلي إن الراجل ده مختلف
قعدنا نتكلم
وعرفت إن اسمه عمر
وعنده تسعة وثلاثين سنة
ومهندس ناجح
وإنه اتطلق من خمس سنين بعد جواز قصير جدًا
والغريب إنه ما سألنيش عن ياسر
ولا عن الخيانة
ولا عن تفاصيل مرضي
كان بيتعامل معايا كأن الماضي مش أهم حاجة في شخصيتي
وكان ده جديد عليا
جديد ومريح
الأيام بدأت تمشي بسرعة
وعمر بقى موجود بشكل بسيط في حياتي
مكالمة كل كام يوم
رسالة يطمن فيها
زيارة قصيرة بعد التحاليل
ولا مرة ضغط عليا
ولا مرة حاول يقرب زيادة
ولا مرة حسسني إني مدينة له بحاجة
أما ياسر
فكانت حياته بتنهار بسرعة أكبر من أي حد يتخيل
بعد ما اكتشف خيانة رانيا بدأت الخناقات بينهم تتحول لحرب
كل يوم مشاكل
كل يوم اتهامات
كل يوم فضايح
وفي النهاية رانيا طلبت الطلاق
مش بس كده
طلبت نص كل حاجة تقدر تاخدها
وفي جلسات المحاكم عرف إن جزء كبير من فلوسه اتصرف من حساباته خلال الشهور اللي فاتت
وعرف إنها كانت بتستغله من البداية
وقتها افتكر حاجة
افتكر الليلة اللي رانيا وقفت فيها قدامي في مركز الأورام
وافتكر ضحكتها
وافتكر شماتتها
وافتكر إنه سمحلها تعمل كده
بل ويمكن شجعها من غير ما يقصد
لأول مرة بدأ يحس بحجم الجري..مة اللي عملها
في الوقت ده كنت أنا بعيش أيام مختلفة تمامًا
نتيجة جديدة أكدت إن حالتي مستقرة
والدكتور قال إن المؤشرات كلها ممتازة
أمي كانت بتضحك من قلبها
وأبويا رجع يتكلم عن المستقبل
حتى أنا بدأت أفكر أرجع شغلي بالتدريج
أرجع للحياة
مش مجرد أعيش
وفي يوم عمر طلب يقابل بابا
استغربت جدًا
ولما سألته ليه
ابتسم وقال
علشان أنا داخل البيت من بابه
قلبي دق بعنف
لأول مرة حد يكلمني بالطريقة دي من بعد ياسر
خفت
مش منه
من نفسي
من فكرة الحب نفسها
من فكرة الثقة
من فكرة إني أدي قلبي لحد تاني
لكن عمر كان صبور
بشكل خلاني أهدى
قاللي
أنا مش مستعجل
خالص
ولو احتجتي سنة كاملة علشان تثقي فيا هستنى
الكلمات دي كانت أغلى عندي من أي كلام حب
لأن الراجل اللي بيحب بجد ما بيجبرش
ولا بيضغط
ولا بيستغل ضعفك
أما ياسر
فكان بيغرق أكتر
وفي ليلة متأخرة موبايلي رن
بصيت في الشاشة
واتجمدت
ياسر
أول مرة يتصل من شهور
سيبت الموبايل يرن
وقف
وبعدين رجع يرن
وبعدين رسالة
لو سمحتي ردي ضروري
ما رديتش
لكن بعدها بخمس دقايق وصلت رسالة تانية
أنا بره البيت
عايز أشوفك دقيقة واحدة
نزلت الستارة وبصيت من الشباك
ولقيته فعلًا واقف تحت
وشكله متبهدل
خاسس أكتر
وشعره فيه شعر أبيض ما كانش موجود
فضل واقف أكتر من ساعة
وأخيرًا نزلت
مش علشانه
علشان أعرف هو عايز إيه
أول ما شافني وقف بسرعة
وبصلي وكأنه شاف حد رجع من الموت
قال
إنتي جميلة
نظرتله ببرود
وقلت
عايز إيه
بلع ريقه بصعوبة
وقال
وحشتيني
الجملة دي زمان كانت كفيلة تخليني أعيط
دلوقتي ما حركتش فيا حاجة
قلت
بعد إيه
قال
بعد ما فهمت كل حاجة
قلت
فهمت إيه
قال
فهمت إنك كنت نعمة
وإني ضيعتك
سكت شوية وبعدين كمل
أنا اتعاقبت يا ندى
والله اتعاقبت
كل حاجة ضاعت مني
شغلي
وبيتي
وجوازي
وراحتي
كل حاجة
وبعدين بصلي وقال
بس أكتر حاجة وجعتني إني خسرتك
كنت واقفة قدامه بهدوء
لكن جوايا مشاعر كتير
مش حب
ولا شوق
لكن حزن على الراجل اللي كان يومًا أهم شخص في حياتي
قلت
أنا لما كنت بموت كنت محتاجاك
وقتها ما كنتش موجود
دلوقتي أنا بقيت كويسة
جاي ليه
نزل راسه
وما عرفش يرد
فكملت
أنا مش زعلانة منك دلوقتي يا ياسر
أنا تخطيت مرحلة الزعل
قال بسرعة
يعني ممكن تسامحيني
ابتسمت لأول مرة
بس كانت ابتسامة حزينة
وقلت
أنا سامحتك فعلًا
لأن الكره حمل تقيل
لكن التسامح حاجة
والرجوع حاجة تانية
رفع عينه بسرعة
وقال
يعني إيه
قلت
يعني مستحيل أرجع
كأن حد ضربه
فضل يبصلي ثواني طويلة
وبعدين سأل بصوت مكسور
في حد غيري
سكت لحظة
وفكرت في عمر
وفي احترامه
وفي صبره
وفي الطريقة اللي خلاني أرجع أثق بنفسي بيها
وقلت بهدوء
يمكن
في اللحظة دي شفت قلبه بيتكسر قدامي
نفس الكسر اللي عشته زمان
لكن الفرق إن أنا ما كنتش سبب وجعه
هو كان سبب وجعه بنفسه
لفيت ومشيت
وسبته واقف مكانه
لكن وأنا راجعة البيت
ما كنتش أعرف إن ياسر شاف حاجة هتكون أصعب عليه من كل اللي فات
لأنه بعد يومين فقط
هيشوفني واقفة جنب عمر
وهيفهم وقتها إن الست اللي سابها وهي مريضة
بقت حلم مستحيل يرجعله تاني
يتبع