حمايا كان عنده زهرة الربيع 2

تاني يوم الصبح، راح راضي مع المحامي وباعوا جزء بسيط جداً من طرف الأرض الزراعية لمستثمر كبير، وسددوا كل ديون البنوك بالكامل، وفضل الجزء الأكبر والأغلى من الأرض ملك خالص ليا ولراضي، وبقى نصيبنا في العمارتين متسجل رسمي وشرعي وراضي هو المدير الوحيد لكل مليم داخل وخارج. مرت تلات أسابيع، والوضع في البيت اتقلب تماماً. سلايفي بقوا يتجنبوا يتقابلوا معايا في المدخل، ولو الصدفة جمعتنا تلاقيهم يوطوا راسهم في الأرض ويسلموا بصوت واطي وأدب مصطنع خوفاً من إن راضي يضيق عليهم في حسابات الإيجار.

راضي كان مرتاح، وشايل هم إخواته برضه عشان أصله طيب، وبدأ يرتب أموره عشان يفتح مشروع كبير على باقي قطعة الأرض اللي فضلت معانا. لكن الغل والحقد لما بيتعشش في نفوس اتعودت على الطمع مابيمـ,ـوتش بالسهولة دي. عادل وتامر كانوا بيتقابلوا في السر على قهوة بعيدة عن المنطقة، والسم بياكل في قلوبهم.. إزاي الأخ الصغير اللي كانوا بيعتبروه هوا، بقى هو السيد وصاحب الكلمة الكبيرة على نص العماير والأرض اللي تسوى ملايين؟

وفي ليلة مطرة وعواصف، والساعة عدت اتنين بعد نص الليل، صحينا على صوت سارينة عربيات مطافي مفزعة، وصريخ جاي من ناحية الطريق الزراعي، وتليفون راضي رن برقم خفير الأرض وهو بيصرخ بهيستيريا: «الحق يا أستاذ راضي!! الأرض والمخازن اللي بنيناها عليها والعربيات اللي هناك بتولع كلها.. وفيه ملثمين حاطين بنزين وبيهربوا!». راضي اتنفض من السرير، وجري على الباب وهو بيلبس هدومه بهستيريا، بس أول ما فتح باب الشقة عشان ينزل، اتفاجئ بوجود حد واقف قدام الباب في الضلمة، حد ماسك في إيده حاجة لمعت في نور السلم، وخلى الدم يتجمد في عروقنا إحنا الاتنين!

أول ما راضي شهق ورجع خطوة لورا، عم صابر رمى الساطور على الأرض بصوت رنة حديد فزعت البيت كله، وانحنى على ركبته ومسك في رجل راضي وهو بينتحب بصوت مكتوم: «الحق يا أستاذ راضي.. أقسم بالله العظيم ما كان قصدي، هما اللي غصبوني وضحكوا عليا وهددوني بلقمة عيشي وعيالي!». راضي مسكه من كتافه وقوّمه وهو مصدوم ومخه مشتت بين صوت سارينات المطافي اللي مسموعة من بعيد وبين المنظر اللي قدامه: «عم صابر! في إيه؟ فهمني إيه اللي بيحصل وإيه حكاية النار اللي والعة في الأرض؟