العلاقة بينا مجرد دكتور منال كريم 2

و بكده انكشف سر من اسرار البنات الأربعة..

كانت علياء لسه بتعيط اول ما سمعت صوت البنات غطت نفسها بالغطاء و مثلت النوم.
///////

تاني يوم في كلية داليا ،جت امل و معها شوكولاته و قالت بهدوء: انا اسفة على اللي حصل امبارح

ضحكت داليا و قالت: حصل خير

امل : ممكن نبقي أصحاب

داليا: حاجة تسعدني

//////////
بتعدي الايام و كل بنت تحاول تتخطي اللي حصل ليها ،لحد ما خلص العام الدراسي بتفوق البنات و جت إجازة اخر  السنة و كل البنات متحمسين يرجعوا بيتوتهم الا الأربعة بنات

قالت صبا: لو طلبت من مدام  نور تخليني هنا ،هتوافق

داليا: ياريت توافق ،انا مش عايزة ارجع البيت

ياسمين: ليه بس يا بنات، انا اهلي وحشوني جدا

صبا: يعني انتي عايزة ترجعي

ياسمين: طبعا

و قامت من مكانها و قالت: اشوف وشكم بخير

و مشيت ياسمين ،و علياء محتارة مش عارفة ترجع البلد أو لا مع العلم محدش من أهلها عارف انها في سكن طالبات هما فاكرين أنها عايشة مع قاسم ،

وصلت رسالة على تلفيونها من قاسم: اخرجي انا مستني برة

خدت نفس و كتبت : مع أن مش عايزة اشوف وشك و لا يجمعني بيك مكان بس مفيش حل تاني.

و قامت هي كمان و قالت: انا ماشية

داليا: انتي كمان

علياء: أيوة جوزي مستني برة

فجرت المفاجأة و مشيت و هما الاتنين مصدومين قالت صبا: متجوزة ازاي

داليا: انا عارفة بقي، خلينا في نفسنا ، انا همشي مفيش حل تاني

صبا بحزن: مع السلامة.

و مشيت داليا و فضلت صبا و نور تلف تشوف كل البنات مشيوا او لا لقت صبا لسه موجودة، فقالت : بتعملي ايه هنا يا صبا،الكل مشي

قامت صبا وافقت و قالت: مدام نور هو ينفع اقعد هنا في  الإجازة …

نور : لا طبعا مينفعش

نزلت دموع صبا و قالت: ليه بس

قربت نور منها و قالت بحنان: مالك يا حبيبتي، الكل مشتاق يرجع بيته

صبا: الا انا مش عايزة ارجع محدش بيحبني و لا بيحس بيا

نور بهدوء: طيب احكيلي

صبا بكل عنف قطعت الفستان من على كتفها على ظهرت  شامة سودة ، استنت كلمة سليبة من نور زي ما الكل يعمل بس نور ابتسمت و قالت: مش فاهمة ايه المشكلة

شاورت صبا على الشامة و قالت: حضرتك مش شايفة

نور: انا شايفة شامة سودة زدتك جمال و تميز

ضحكت بعدم تصديق و قالت: بلاش تضحكي عليا ، انا و انتي عارفين انها مشوهه جسمي، انا بتعرض للتنمر من اقرب الناس ليا، بتعاقب على حاجة مليش ذنب فيها، عارفة وصلت لفين ،أن ماما كانت ترفض اني البس فستانين مكشوفة زي باقي الاطفال و تقولي انتي جسمك مشوه، و بابا قال لماما مش هنجيب اطفال تاني ل يطلعوا زيها،. أنا جيت الجامعة هنا علشان ابعد عنهم ،اهلي لو شافوا حد يتنمر عليا ،بدل ما يدفعوا عني، يقولوا ما هو عنده حق، انتي مشوهه