عز وغزل انجى الخطيب 6
” ثبت عز عينه في عيون أبوه. “عارف.” “يبقى اعرف واجبك.” وسكت لحظة، ثم قال وهو بيشاور ناحية السلم: “اطلع لعروستك… كفاياك إكده.” فضل عز واقف مكانه. بص لغزل. كانت واقفة منزلة راسهارفي الارض، بتحاول تمنع دموعها تنزل قدامهم.
قال العمدة من غير ما يحول عينه عن ابنه: “والبت دي…” لف ناحية غزل. “ادخلي أوضتك، ومن بكرة ما أشوفكيش خارجة من السرايا إلا بإذن مني. مفهوم؟” هزت راسها بسرعة. “حاضر يا بيه.” لفت تمشي. لكن قبل ما تبعد، خطفت نظرة صغيرة ناحية عز.
نظرة مليانة ألف كلمة… و وجع… واعتذار… وحب مستحيل. أما عز… ففضل واقف يبص في أثرها لحد ما اختفت جوه الممر. ثم أخد نفسًا طويلًا، وطلع السلم بخطوات تقيلة. كان رايح ناحية جناحه… لكن قلبه، للمرة الألف، اتساب واقف في مكان غزل.
#انجي_الخطيب فتح عز باب الجناح ببطء، وكان قلبة مقبوض وكأنه داخل سجن. لقى ياسمين قاعدة على الكرسي اللي قدام التسريحة، لسة فكة شعرها الأسود الطويل على كتفها، وحاطة إيدها على خدها اللي كان لسة معلّم من القلم. أول ما سمع صوت الباب، رفعت راسها وبصتله في المراية.
مكنش في عيونها دموع، كان فيه بريق من التحدي والشرود اللي يوحي إن الحرب لسة مخلصتش. قفل عز الباب وراه بهدوء، وفضل واقف مكانه، عيونه متبتة على الأرض كأنه بيحاول يجمع بقايا أعصابه. لفت ياسمين بكرسيها ليه ، وقالت بصوت هادئ ومستفز، بيقطعه السكوت: “أهلاً بحضرة الضابط.
. العريس اللي ساب عروسته في ليلة دخلتها، ورايح يدور على خدامة في نص الليل، وبعدين يرجع يقف قدام أبوه زي الولد الصغير؟!” رفع عز عينه ليها، وكانت نظراته حادة لدرجة تخلي الحجر ينطق، وتقدم خطوتين بطيئين وقال بصوت جاف وواطي: “كلمة كمان يا ياسمين، وهخلي الليلة دي تنتهي بجد بالطريقة اللي كنت قايل عليها من شوية.
” ضحكت ياسمين ضحكة قصيرة مليانة سخرية، وقامت وقفت وهي بتعدل فستانها الأبيض، وقالت: “تطلقني؟ هتعملها؟ جرّب كده.. واطلع قول لأبوك والمأمور إنك طلقت بنته بعد ساعة من كتب الكتاب عشان جريت ورا بت شغالة! يومها البلد كلها هتاكل وشك، وسمعة عيلة العزايزة اللي أبوك ماشي يتباها بيها هتتفرم في التراب.
” قرب منها عز لحد ما بقت بينه وبين الحائط مسافة خطوات معدودة، وبص في عيونها مباشرة وقال ببرود مرعب: “أنتِ فاكرة إن الكراسي والألقاب بتهمني؟ أو إن كلام البلد ممكن يكسر لي كلمة؟ اسمعي مني زين يا بنت المأمور.. أنا اتجوزتك عشان أرضي أبوي، وعشان أقفل باب كلام طويل.