مرات عمي طردتنى مشيره محمد
سكت شوية وبعدين كمل
ونوال بتقول إن كل ده حصل بسببك وإنك فضحتي البيت قدام الناس
حسيت إني تعبت من نفس الأسطوانة
قلتله
يا عمي أنا لا دخلت بين أحمد ومراته ولا طلبت من حد يسيب البيت أنا كل اللي عملته إني طلبت أفهم الفلوس اللي دفعتها والورق اللي مضيته
قال
أنا عارف يا مريم بس البيت بقى فيه مشاكل كتير
رديت
المشاكل دي كانت موجودة من قبل ما أعرف الحقيقة إنتوا بس كنتوا بتغطوا عليها وبتطلبوا مني أسكت وأدفع
عمي سكت
وبعدين قال
أنا عايز أشوفك يا بنتي ولو مرة واحدة نتكلم من غير محامين ولا ورق
قلتله
لما تكون مستعد تسمعني من غير ما تطلب مني أتنازل عن حقي أو أرجع أتحمل مسؤولية مش مسؤوليتي نبقى نتكلم
قفلت المكالمة وفضلت قاعدة لوحدي شوية
كنت زعلانة على عمي رغم كل اللي حصل
لأن جزء مني لسه فاكر الراجل اللي وقف جنبي يوم وفاة أبويا وأمي
لكن الجزء التاني كان فاهم إن الوفاء مش معناه إني أسمح لأي حد يستغلني طول العمر
بعد يومين أحمد جه لحد باب شقتي
لما فتحتله لقيته واقف لوحده وشكله مرهق
قال
ممكن أدخل يا مريم
ترددت لحظة وبعدين خليته يدخل
قعد على الكنبة وبص حواليه وقال
الشقة صغيرة بس شكلها مريح
قلتله
على الأقل أنا هنا مش حاسة إني ضيفة تقيلة على حد
هز راسه وقال
أنا استاهل الكلام ده
سكت شوية وبعدها قال
مراتي عرفت تفاصيل الاتفاق وعرفت إن فيه مبالغ لازم تتراجع وإن ماما كانت مخبية عنها حاجات كتير وكانت فاكرة إن البيت مفيش عليه أي مشاكل وإن كل حاجة جاهزة ليها وللعيال
قلتله
وده مش ذنبي
قال بسرعة
عارف إنه مش ذنبك بس أنا كنت عايز أعتذرلك
بصيتله وسألته
إنت جاي تعتذر علشان عرفت إنك غلطت ولا علشان الدنيا اتقلبت عليك
اتوجع من السؤال لكنه مردش بسرعة
فضل ساكت لحد ما قال
يمكن الاتنين يا مريم أنا كنت عايز أريح مراتي وولادي وافتكرت إنك هتتفهمي وهتمشي من غير ما تعملي مشكلة لكني مكنتش بفكر في اللي هتحسي بيه ولا في اللي دفعتيه علشاننا