يعني محدش فيكم جه نورهان العشرى 2

دخل رائد الشقة ورا صافية، ورزع الباب وراه بكل قوته. كانت صافية واقفة في نص الصالة، وشها شاحب وزي ما يكون كبرت عشر سنين في يوم واحد. رائد بانفعال: “انتي اتجننتي يا صافية؟ إزاي تقولي على أمي كدة؟ إزاي تقولي هتحني إيدك لما تمو.ت؟ دي عمتك قبل ما تكون حماتك! فين الأصول؟” صافية بصوت هادي ومرعب من كتر الوجع: “الأصول؟ إنت اللي بتكلمني عن الأصول ! الأصول إن عمتي وحماتي وبنتها يتحنوا ويلبسوا ألوان وأنا لسه بدفن أمي؟ الأصول إنهم ما يجيوش يمسحوا دمعتي ويعزوني و لا و بيضحكوا في وشي وهما شمتانين في مو.ت أمي” رائد: “هما حرين في بيتهم! يفرحوا، يلبسوا، دي حياتهم.. لكن لسانك ما يطولش على أمي كدا، و بعدين أنا اتكلمت معاهم في موضوع الحنة دا سعاد حلفتلي أنهم ميقصدوش وأنه الموضوع جه صدفة، وهما عاجنين الحنة من قبل ما أمكن تمو.ت!” صافية صرخت بكسرة قلب: ” أنا مش هسامحك يا رائد.. مش هسامحك على كسرة خاطري دي، ولا هسامح أهلك. إنت النهاردة بعتني ووقفت في صف أمك وأختك وهنت أمي وهي في دار الحق. خليك معاهم، خليك بقى معاهم واعرف انك خسرتني للأبد. سابت رائد واقف مكانه، ودخلت الأوضة ورزعت الباب، وانفجرت في الدموع وكان صوت بكاها بيقطع القلب، وهي حاسة إنها بقت “يتيمة” بجد، لا أم ولا زوج حاسس بيها. بقلم نورهان العشري نزل رائد لأمه وهو متضايق، لقاها قاعدة ماسكة سبحتها وبتتمسكن، وأول ما شافته بدأت تمسح دموع “تماسيح”. رائد بضيق: “خلاص يا أمي، انا شديت صافية وحقك عليا أنا.” اعتماد بصوت واطي ومكسور: “حق إيه يا ابني الموضوع أكبر من كدا؟ أنا خلاص يا رائد، حاسة إن أجلي قرب، ونفسي قبل ما أمو.ت أشوفلك حتة عيل يشيل اسمك ويسندك. أنت بقالك قد إيه متجوز؟” رائد (باستغراب): “بقالنا ٦ شهور بس يا أمي! لسه بدري اوي على الكلام في الموضوع دا و خصوصا وصافية في الحالة دي.” اعتماد بخبث: “يا حبيبي الست شهور دول يبان فيهم لو الأرض بتطرح ولا بور. و البت دي شكلها مابتخلفش، وطالعة لأمها، قعدت سنين عقبال ما جابتها. أنا قلبي واكلني عليك يا رائد، وخايفة أمو.ت وماشوفش عيالك.” رائد: ” بعد الشر عنك يا أمي و بعدين ده نصيب، وإحنا لسه مالحقناش..” اعتماد قربت منه وطبطبت عليه: “لا يا ابني العمر بيجري. و أنت وحيد وأنا قلبي واكلني عليك و يعني بصراحة فكرت في نادية بنت عمتك زينب زينة البنات، أدب وأصل وهتخدمك وتخدمنا، وتملى عليك البيت عيال. وصافية تفضل موجودة بردو دي مهما أن كان بنت أخويا هرميها يعني ! ها أيه رأيك رائد وقف بصدمة وذهول: “تجوزيني؟ أنتي بتقولي إيه يا أمي؟ أجوز على صافية وهي في الحالة دي؟ مستحيل! أنا بحب صافية ومقدرش أعمل فيها كدة، وبعدين موضوع الخلفة ده بتاع ربنا، مش وقته خالص الكلام ده! اعتماد بحزن مصطنع: “بترفض طلب أمك يا رائد؟ أنا اللي عايزة مصلحتك؟ بكره لما تكبر وتلاقي نفسك وحيد، هتعرف إن كلامي كان صح. فكر يا ابني، فكر في اسمك و اسم أبوك اللي هيقطع من الدنيا لو فضلت مع البت دي!” بقلم نورهان العشري رائد ساب أمه وخرج الشارع وهو حاسس إن الدنيا كلها بتلف بيه، كلام أمه عن الخلفة بدأ يرمي بذرة الشك في قلبه، رغم حبه لصافية. ******* صافية فضلت على خصامها مع رائد لمدة شهر على الرغم أنه عمل المستحيل عشان يصالحها و هي لسه قلبها قافل من ناحيته، بس هو مسكتش لحد ما صالحها و الغريب بقى أن اعتماد و سعاد اعتذرولها و بقوا حلوين معاها أوي حتى لما بقت تنزل تحت بقول يعاملوها احسن معاملة و كمان بيقدمولها الشاي والعصير وهي قاعدة هانم. و في يوم كانت نازلة تحت و دخلت ملقتش حد في الصالة و لسه هتدخل المطبخ. شافت اعتماد واقفة مديّة ضهرها للباب، وموطية راسها فوق صينية العصير و طلعت من جيب عبايتها شريط برشم متغلف وبعدين ضغطت على حباية نزلت في كباية المانج. صافية شافتها وهي بتقلب بالمعلقة عشان الحباية تدوب وسمعتها بتهمس بصوت واطي: “اشربي يا بت دلال. و وريني بقى هتعمري في البيت ده إزاي وأنتي أرضك بايرة. و بكرة ابني يتجوز ستك اللي تملاله البيت عيال. صافية حست بصداع في دماغها الدنيا اسودت في عينها، بس مسكت نفسها. دخلت المطبخ فجأة وهي بترسم ابتسامة باهتة على وشها: “تسلم إيدك يا حماتي.. تعبتي نفسك ليه ” اعتماد اتخضت ودارت الشريط بسرعة في جيبها، ووشها جاب ألوان: “خضتيني يا بنتي! تعب إيه بس يا حبيبتي، ده أنتي دبلانة وأصفرّيتي من ساعة مو.ت أمك، قولت أغذيكي شوية و عملت عصير المانجا اللي بتحبيها ترد روحك. يالا، اشربيها كلها قدامي عشان أطمن إنك بقيتي كويسة.” صافية مسكت الكباية، عينيها جت في عين اعتماد، في نظرة طويلة . رفعت الكباية و فجأة قالتلها ” هو ايه اللي في الحلة دا يا عمتي ؟ ” اعتماد بصت وراها وفي ثانية، لفت صافية ودلقت العصير في قصرية الزرع اللي ورا الشباك، ومسحت بوقها بضهر إيدها وقالت : بقلم نورهان العشري “طعمه مر أوي يا عمتي.. كأن فيها دواء.” اعتماد بارتباك: “مر؟ تلاقي المانجا بس لسه خضرا شوية.. المهم إنك شربتيها، بالهنا والشفاء يا حبيبتي.” تاني يوم كان جاي لسعاد عريس واعتماد كانت فرحانه فرحة كبيرة وماشية وتوزع شربات، وسعاد لابسة ومتمكيجة، و الفرحة مش سيعاها رائد دخل لقى الدنيا زحمة، وصافية واقفة بعيد، عينيها وواقفة ولا اكنها غريبة . راحت اعتماد نادته و وشوشته في ودنه): “شوف النسب يا رائد عريس لُقطة، وأصل وفصل، مش زي ناس دخلوا بيتنا بالفقر والهم. دا النهاردة يوم الهنا.. بص مراتك عاملة ازاي يا ابني ولا اكنها واقفة في ميتم، لا باركتلنا ولا ساعدتنا في حاجة ، وكأن فرحة سعاد مزعلاها” رائد بص لصافية بضيق وراحلها: “في إيه يا صافية؟ إيه الوقفة دي؟ أختي جايلها عريس، والبيت كله فرحان، إنتي مالك واقفة كأنك غريبة؟ عيب تقابلي الناس بالوش الخشب ده، هيقولوا عليكي غيرانة ولا باصة لها في جوازتها!” صافية بصت له بذهول، وبصت لاعتماد اللي كانت بتغمز لسعاد بخبث ومردتش. طلعت شقتها وهي بتجر خيبتها وراها. رائد دخل الشقة بعد ما الناس مشيت، كان وشه عليه غضب ربنا: “ممكن أفهم إيه اللي هببتيه تحت ده؟ إنتي عايزة تصغريني قدام الناس؟ أمي تقول عليكي إيه؟ وأختي اللي فرحتها مكسورة بسبب بوزك ده؟ ليه الكره ده كله لأهلي؟” صافية انفجرت فجأة بصوت كله قهر: “أهلك؟ أهلك اللي بيحطولي سم في الأكل يا رائد؟ أهلك اللي بيخططوا عشان مخلفش منك و بيحطولي حبوب منع الحمل في الأكل و العصير؟” رائد وقف مكانه، عينيه برقت بصدمة، وبعدين ملامحه اتحولت للسخرية: “سم؟ وحبوب منع حمل؟ إنتي أكيد جرا لعقلك حاجة يا صافية! أمي اللي بتصلي الفجر في حاضر تحطلك حبوب منع حمل؟ ليه وعشان إيه؟” صافية بانهيار: “عشان تكسر عيني قدامك! عشان تقولك دي مبتخلفش فتجوزك غيري أنا شوفتها يا رائد. شوفتها بعيني وهي بتحط الحبوب في العصير، وسمعتها بودني وهي بتدعي عليا انك تسيبني و تتجوز غيري! اسمعني يا رائد، أمك بتقتل حلمنا في عيل يربطنا ببعض!” رائد هجم عليها ومسك دراعها بعنف: “اسكتي! قسماً بالله لو نطقتي كلمة تانية في حق أمي ليكون ليا تصرف تاني معاكي! أنتي إزاي بالبشاعة دي؟ عايزة تطلعي أمي مجرمة عشان تداري على غيرتك من سعاد؟ أمي ست طيبة حتى لو كلامها تقيل شوية بس متستاهلش منك تتهميها اتهام حقير زي دا !” صافية بتمسح دموعها بقوة و بتقوله: ” اتهام حقير! طب تعالى ننزل دلوقتي، ونفتش جيب عبايتها، ولو ملقتش شريط البرشام يبقى أنا مريضة ومجنونة، إيه رأيك؟” رائد بصراخ : “أنزل أفتش أمي! أنتي عايزاني أهين أمي عشان أصدق كذبك أنا مش هقولهم حاجة، مش عشان مصدقك، لا، عشان خايف على قلبهم يتكسر لما يعرفوا إن مرات ابنهم اللي دخلت بيتهم بتفكر فيهم بالشكل ده! بطلي تكرهي أهلي يا صافية، وبطلي تعيشي في دور الضحية، لأن صبري عليكي ليه حدود!” رائد ساب الشقة وخرج، وصافية فضلت واقفة في نص الصالة، حاسة إن الدنيا بتضيق عليها لمت شعرها ورفعت راسها، وعينيها وهي بتقول بمرارة “مش مصدقني يا رائد؟ ماشي. بدل الحقيقة وجعاك، أنا هوريك حقارتهم. بس المرة دي الفضيحة هتكون على عينك يا تاجر والكل هيعرف مين هي اعتماد ومين هي بنت دلال!” *** بعد مرور شهرين كانت اعتماد قاعدة في الصالة، رائد راجع من شغله وتعبان، و بدأت في النغمة المعتادة. بقلم نورهان العشري “يا رائد يا ابني، قلبي واكلني عليك.. بقالكم ٨ شهور أهو وصافية مفيش منها الرجا. أنت كدا عداك العيب يا ابني. ولو مش عجباك نادية بنت عمتك. أيه رأيك في هدير أخت سمير خطيب سعاد، ، بت زي القمر وأدب و أخلاق، وأهلها يشرفوا بلد. اتجوزها واملى البيت عيال و حققلي حلمي سعاد بلهفة: ـ اه يا رائد اسمع من امك وأهو صابر خطيبي زمانه جاي ايه رأيك نجس نبضه! رائد بضيق وزهق: “يا أمي قولتلك مش عايز أفتح الموضوع ده دلوقتي..” في اللحظة دي، دخلت صافية الصالة، بس المرة دي كانت داخلة وهي بتضحك ووشها منور وماسكة ورقة في إيدها. “مش تباركيلي يا حماتي؟ مش تباركي لأخت جوزك يا سعاد؟ أنا حامل! التحاليل لسه طالعة أهي، والدكتورة قالتلي اني حامل في الشهر التاني !” رائد وقف مكانه مذهول، عينيه برقت من الفرحة. و فجأة قام جري على صافية وشالها ولف بيها في نص الصالة وهو بيضحك بصوت عالي: ” و أخيرا حامل يا صافية؟ الحمد لله يا رب! الحمد لله!” اعتماد وسعاد وقفوا كأن جردل تلج نزل فوق راسهم. وشوشهم جابت ألوان، وعينيهم كانت بتقول إزاي؟ وإحنا بنحط الحبوب بقالنا اكتر من خمس شهور؟! اعتماد بابتسامة صفرا : “ألف مبروك يا حبيبتي.. مبروك يا صافية، طلعتي بتخلفي اهو.” سعاد بغل مكتوم: “مبروك يا مِرات أخويا.. ربنا يكملك على خير.” صافية كانت شايفة الغدر في عينيهم، و خصوصا وهي شيفاهم بيتغمزوا و بيشاوروا بعنيهم على المطبخ فقررت تنهي المسرحية دي للأبد. بقلم نورهان العشري صافية بدلال: ” اسندني يا رائد عايزة أدخل الحمام. سندها رائد لحد ما قامت و دخلت جوا واول ما دخلت راحت على المطبخ وبحركة سريعة شغلت تسجيل الصوت في التليفون وحطته ورا علبة السكر، ودخلت الحمام وقفلت الباب. أول ما الباب اتقفل، اعتماد ندهت سعاد بلهفة وهما بيولولوا في المطبخ. اعتماد: يادي المصيبة! يادي النيلة السودا يا سعاد! إزاي دي حملت؟ أنتي يا بت مش كنتي بتحطيلها حبوب منع الحمل في العصير أو الشاي كل يوم؟ أنتي كنتي بتضحكي عليا ولا إيه؟” سعاد بلهفة: “والله يا ماما كنت بحطها وبدوبها قدام عينيكي! دانا كنت بقول اعملها الشاي أو كباية المانجا أو اابرتقان و احطلها فيهم الحباية. إزاي دي حملت؟ دي باين عليها مكنتش بتشرب العصير وكانت بتشتغلنا!” اعتماد بغل: “دي حية زي أمها دلال. بقى بتضحك علينا و بتحمل عشان تثبت رجليها في البيت؟ وحياة أمي لأعرفها مقامها، بس اهدي دلوقتي لما نشوف هنعمل إيه في المصيبة دي.” سعاد بغل: ” البت دي لازم تسقط بأي طريقة. انا مش هتحمل تفضل قاعدة في البيت. نفسي تغور بقى. خرجت صافية من الحمام ببرود، ودخلت المطبخ وهما لسه واقفين بيندبوا حظهم. صافية ببراءة: “محدش شاف تليفوني؟ آه.. أهو ورا علبة السكر، كنت ناسية إني حطاه هنا.” بقلم نورهان العشري أخدت التليفون وطلعت الصالة، لقت رائد قاعد بيحلم بابنه اللي جاي. صافية قعدت جنبه، ووشها اتحول من الفرحة للغضب وهي بتقوله. صافية: رائد. نادي على أمك و سعاد حالا رائد: في ايه يا صافية ؟ صافية بجدية: هتعرف بس نادي عليهم رائد سمع كلامها و نده عليهم و اول ما قعدوا صافية قالت بحدة: ” فاكر لما قولتلك إن أهلك بيحطولي حبوب منع حمل وأنت كذبتني وقولت عليا مجنونة؟” رائد بضيق: “لازمته أيه الكلام دا يا صافية دلوقتي؟ ما بلاش نفتح السيرة دي.” صافية بحدة: “لازم نفتحها.. اسمع التسجيل ده، و اسمع ‘الست اللي بتصلي الفجر حاضر واللي بتخاف ربنا وبتدعيلي بالخلف، كانت بتقول إيه في المطبخ من دقيقتين.” فتحت صافية التسجيل، وصوت اعتماد وسعاد ملأ الأوضة: “أنتي يا بت مش كنتي بتحطيلها حبوب منع الحمل في العصير؟”. رائد كان بيسمع والصدمة بتلجم لسانه. ملامح وشه اتغيرت من الفرحة للذهول، وبعدين للغضب المرعب. بص لأمه وأخته اللي وشهم اصفر من الصدمة. رائد بانفعال: “بقى أنتي يا أمي انتي و اختي؟ أنتوا تعملوا في مراتي وفيا كدا! بتحطوا حبوب منع الحمل عشان تقطعوا نسلي و تخربوا بيتي؟” اعتماد حاولت تتكلم، بس رائد رزع التربيزة بإيده خلى الكل ينتفض: بقلم نورهان العشري “ولا كلمة! أنا كنت أعمى وبقول مِراتي بتبلى عليكم، لكن دلوقت عرفت مين اللي كان عايز يسمملي حياتي . ليه كدا ؟ حرام عليكوا؟ تعملوا فيا كدا ليه؟ حقك عليا يا صافية.. .” رائد كان واقف في نص الصالة، عروق رقبة بارزة وعينيه بتطلع شرار. مسك التليفون و شغل التسجيل مرة تانية و كأنه مش مصدق من اللي سمعه و عايز يتأكد من كل حرف و رفع الصوت لآخره، وصوت اعتماد وسعاد في التسجيل وهو بيرن في البيت كله: “أنتي يا بت مش كنتي بتحطيلها حبوب منع الحمل في العصير؟.. إزاي دي حملت؟ دي عفريتة يا ماما!” سعاد بدأت تترعش واعتماد حاولت تداري ارتباكها بزعيق مصطنع: “إيه القرف ده يا رائد؟ أنت بتسجل لأمك؟ دي أكيد لعبة من ألعاب مِراتك الشيطانه دي!” رائد بصوت زي الرعد: “لعبة؟ صوتك ده لعبة؟ غلك اللي طالع في التسجيل ده لعبة؟ كنتي بتمو.تي ابني قبل ما ييجي يا أمي؟ كنتي بتقطعي نسلي وأنا اللي كنت بقول عليكي ست مؤمنة؟ وحياة وجع قلب صافية، ودموعها اللي نزلت بسببك، لأعرفكم يعني ايه الظلم اللي بجد!” في عز الخناق باب الشقة كان موارب، ودخل صابر خطيب سعاد وهو شايل علبة حلويات وداخل بابتسامة، لكنه اتصدم من اللي سمعه والعلبة وقعت من إيده على الأرض أول ما سمع التسجيل بوضوح وهو شغال تاني. الكل سكت.. سعاد بصت لسمير بذهول وكأن روحها بتتسحب. بقلم نورهان العشري سمير بصدمة وقرف: “ده أنتوا مش بني آدمين. أنتوا شياطين! بقى دي العيلة اللي كنت هناسبها! و دي اللنت اللي كانت هتربي عيالي؟ واحدة بتعمل خطط و مؤامرات قذرة لمرت أخوها عشان متخلفش؟” سعاد جريت عليه وهي بتعيط: ” صابر.. افهم يا صابر، دي كانت ساعة شيطان، أمي هي اللي قالتلي..” سمير زق إيدها بقرف: “ابعدي عني! أنا ميشرفنيش أتجوز واحدة منحطة زيك ولا أدخل بيت مليان تعابين زيكوا. اعتبري إن مفيش نصيب بينا، وحسبي الله ونعم الوكيل فيكم!” خرج صابر ورزع الباب وراه، وسعاد وقعت على الأرض تصرخ وتلطم بانهيار، حاسة إن حياتها اتدمرت في ثانية، ورائد بص لأمه بنظرة كلها احتقار، ومسك إيد صافية اللي كانت واقفة بتبكي بصمت بقلم نورهان العشري رائد: “يالا يا صافية.. لمي حاجتك. البيت ده مالناش عيش فيه، والست دي مبقتش أمي.” اعتماد بصراخ: “رائد! هتمشي وتسيبني يا ابني؟ هتمشي عشان خاطر بت دلال؟ أنا عملت كده عشان مصلحتك!” رائد بصراخ : “مصلحتي في انك تحرميني اني أبقى أب، مصلحتي في كسرة قلب مراتي؟ أنا ماشي ومش عايز أشوف وشكم تاني لحد ما أمو.ت!” أخد رائد شنطة صافية وخرجوا من باب الشقة بسرعة. اعتماد شافت ابنها وسندها بيضيع من بين إيدها، جرت وراه وهي بتصرخ بهستيريا: “رائد! استنى يا ابني! متسبنيش لوحدي. يا رائد!” وهي بتجري على السلم الرخام رجلها اتكعبلت في طرف عبايتها، واتزحلقت بقوة. جسمها طار ووقع على السلم، وراسها خبطت في الرخام بقوة خلت صوت الخبطة يسمع في البيت كله. رائد وصافية لفوا مخضوضين، لقوا اعتماد مرمية في آخر السلم، غرقانة في دمها ومابتنطقش. سعاد نزلت تجري وتصوت و فجأة الدنيا اتقلبت بعد مرور أسبوع صافية ورائد قاعدين في شقتهم الجديدة الهادية. رائد وشه شايل هم السنين، وصافية حاطة إيدها على بطنها. رائد: “الدكاترة قالوا إن أمي جالها شلل رباعي يا صافية.. لا هتنطق ولا هتتحرك تاني. وسعاد العريس سابها والناس في المنطقة مابيرحموش حد بكلامهم. صافية بهدوء ووقار: “أنا مش شمتانة يا رائد.. بس ربنا كبير. شفت عمتي اللي كانت بتقول البيت بيتي والكلمة كلمتي؟ أهي دلوقتي لا قادرة تتكلم ولا تتحرك في البيت. وسعاد اللي كانت بتسرق لبسي وتضحك، بقت هي اللي محتاجة حد يلبسها ويأكلها. بصت صافية لصورة أمها دلال اللي محطوطة على التربيزة، وابتسمت بمرارة وقالت في سرها: حقك رجع يا أمي. والظالم مهما طال زمنه، نهايته دايمًا من جنس عمله.” أخد رائد صافية في ح.ضنه، وهو بيقول بحزن ” احنا مش هنرجع نعيش هناك تاني عشان مش هكون مطمن عليكي معاهم. لكن مش هسيبهم. كل يوم وانا راجع من الشغل هعدي عليهم و هسيبلهم الفلوس اللي تكفيهم و مش هخليهم محتاجين حاجة. دول مهما كان أمي و أختي. صافية بهدوء ” اللي تشوفه يا رائد وانا عمري ما هقولك عملتلهم ايه ولا جبتلهم ايه وربنا هيخلف علينا بالخير في حياتن ا وفي ولادنا. وان شاء الله ربنا هيجازيك خير. ربنا ينور بصيرتك و بصيرتنا و يكفينا شر عمى القلوب تمت بقلم نورهان العشري ♥️ مستنية رأيكوا يا حلوين

مقالات ذات صلة

مرات ابني كل يوم

كنت لسه حزينه على 2

مديرة المطعم

محدش من الجرسونات كان

شدت بنتي

الفصل السادس فارس وامل

اترك تعليقاً إلغاء الرد