أول مادخلت العيادة

دينا بصت لأبوها وقالت

أنا مش ههرب يا بابا ومش هتنازل عن حقي حتى لو الموضوع وصل للمحكمة

حسن حط إيده على كتفها وقالها

وده حقك يا بنتي وأنا المرة دي مش هسيبك تشيلي الحمل لوحدك

بعد ساعتين كانت دينا في مكتب المحامية بتقدم أقوالها وبتسلم نسخ المستندات اللي تثبت إن التوقيع الموجود على ملحق التمويل مش توقيعها وإن فيه تحويلات مالية محتاجة تحقيق

وفي نفس الوقت شريف كان قاعد في مكتبه مستني مكالمة من المحامي بتاعه ولما عرف إن دينا قدمت مستندات مضادة اتعصب لدرجة إنه زق كل الورق اللي قدامه على الأرض

إزاي قدرت توصل للملفات دي

المحامي رد عليه بقلق

المشكلة مش في إنها وصلت للملفات المشكلة إن النسخ اللي قدمتها فيها أرقام تحويلات وتواريخ لو اتأكدت رسميًا هتفتح تحقيق في كل العمليات المالية اللي حصلت وقت إدارتك للشركة

شريف مسك راسه بإيديه وقال

أنا مش هسيبها تضيع كل اللي بنيته

المحامي بصله بجدية

إنت لازم تقولي الحقيقة يا شريف هل التوقيع ده توقيعها فعلًا ولا لأ

شريف سكت

المحامي كرر سؤاله

أنا مش هقدر أدافع عنك وأنا مش عارف الحقيقة

شريف رفع عينيه وقال بصوت واطي

أنا مكنتش ناوي أستخدم الورق بالشكل ده بس كان لازم أضمن إن التمويل يفضل موجود

المحامي رد بصدمة

يعني إنت عارف إن الملحق مش متوقع منها

شريف مردش لكن سكوته كان كفاية

وفي اللحظة دي باب المكتب اتفتح ودخلت ميرفت وهي باين عليها التوتر

شريف بص لأمه وقال

إنتي كنتي عارفة إن فيه ورق متزور باسمي وباسم دينا

ميرفت حاولت تتهرب

أنا معرفش إنت بتتكلم عن إيه

شريف قام من مكانه

متكدبيش عليا يا أمي أنا سمعت مكالمتك وإنتي بتقولي إن لازم نتصرف قبل ما دينا تعرف حاجة عن الورق القديم

ميرفت قعدت على الكرسي وهي بتبص حواليها بخوف وبعدين قالت

أنا كنت بحاول أحميك

تحميني من إيه

ميرفت سكتت لحظات وبعدها قالت

أبو نادين كان شريك قديم في أول مشروع ليك وكان فيه خلاف كبير بينه وبين والدك على ملكية الشركة قبل ما يموت