يوم طلاقى اماني سيد
قفلت الورقة.
حسيت إن نفسي ضيق.
قال أبوها
“هي احتفظت بالورقة دي سنين.”
قلت
“ليه جبتها لي؟”
قال
“لأنك كنت فاكر إنك كسرتها.”
سكت.
قال
“هي كانت بتتعالج من آثار اللي حصل مش منك.”
بصيت في الأرض.
قال
“وأنا مش جاي ألومك.”
رفعت عيني له باستغراب.
قال
“أنا جاي أقولك إن بنتي خلاص كملت.”
“أنا عارف.”
“لأ.”
سكت.
“إنت لسه كل ما تشوفها بتفكر في الماضي.”
ما رديتش.
قال
“هي لأ.”
قام من مكانه.
وقبل ما يمشي قال
“خليها تعيش.”
الجملة دي فضلت ترن في ودني.
رجعت البيت.
دخلت أوضتي.
فتحت الدولاب.
لقيت بدلة قديمة كنت لابسها يوم فرحنا.
طلعتها.
قعدت أبص لها.
كنت فاكر إني يومها كنت ببدأ أجمل حياة في الدنيا.
لكن الحقيقة إن أجمل أيام حياتي كانت الأيام اللي مريم كانت فيها جنبي من غير ما تطلب مني حاجة.
وأنا ما فهمتش ده غير بعد ما راحت.
عدت أسابيع.
حاولت أركز في شغلي.
لكن الشركة بدأت تدخل في مشاكل.
شريكي القديم اكتشف إني كنت مخبي عنه ديون.
حصلت خلافات.
ناس كتير بدأت تبعد.
أصحاب كانوا طول الوقت حواليا اختفوا.
حتى اللي كانوا بيشجعوني على كل اللي عملته في مريم ما بقوش موجودين.
وفي ليلة كنت قاعد لوحدي في المكتب لحد متأخر.
دخل عليا المحاسب وقال
“أستاذ ياسر.”
“نعم؟”
قال
“في مشكلة.”
“إيه؟”
“الحسابات مش متقفلة.”
“يعني؟”
“في مبلغ كبير ناقص.”
وقفت.
“ناقص إزاي؟”
قال
“في تحويلات اتعملت من فترة.”
“مين عملها؟”
قال
“إنت.”
بصيت له.
“أنا؟”
قال
“أيوه.”
مسكت الورق.
الأرقام كانت قدامي.
وأنا فاكر إني كنت بحرك الفلوس دي عشان أأمن نفسي.
لكن اللي حصل إن الديون تراكمت.
والفلوس اللي كنت شايفها كتير طلعت أقل بكتير مما كنت متخيل.
قعدت على الكرسي.
المحاسب قال
“لازم ناخد قرار بسرعة.”
قلت
“سيبني لوحدي.”
خرج.
فضلت قاعد في الضلمة.
وفجأة تلفوني رن.
رقم مريم.
قلبي دق.
رديت بسرعة
“ألو؟”
صوتها كان هادي.
“ياسر.”
“أيوه.”
“إنت في المكتب؟”
“أيوه.”
“ممكن تقابلني بكرة؟”
سألتها
“ليه؟”
قالت
“موضوع مهم.”
“حاضر.”
تاني يوم رحت المكان اللي قالت عليه.
كانت قاعدة مستنياني.
قدامها ملف.
قعدت.
قلت
“خير؟”
قالت
“أنا عرفت إن شركتك داخلة في أزمة.”
استغربت.
“عرفتي منين؟”
“الموضوع بقى معروف.”
سكت.
قالت
“أنا مش جاية أشمت.”
قلت
“أنا عارف.”
فتحت الملف.
“أنا عندي عرض شغل ليك.”